“დედამიცის”-ს ესაუბრება მეან-გინეკოლოგი, მედიცინის დოქტორი სოფიო ბოჯგუა.
ზრდის თუ არა ორსულობა covid19-ის მძიმედ გადატანის რისკს?
ორსულობა ეკუთვნის კოვიდ-19 მაღალ რისკ ჯგუფს, რადგან კოვიდ-19 ის გამომწვევი SARS-Cov-2 ვირუსით ინფიცირებული ორსულები 15%-25%-ით უფრო ხშირად მძიმდებიან. აქვე უნდა აღინიშნოს 2020 წლის ბოლოს დაწყებული მასობრივი ვაქცინაციის პროცესში იმუნიზირებულ ორსულებზე დაკვირვებამ და ინფორმაციის შეგროვებამ არ გამოავლინა რაიმე გართულებები ან ცვლილებები, რომლებმაც გავლენა მოახდინა ნაყოფზე ან/და ორსულობის მიმდინარეობაზე.
აშშ-ის და ევროკავშირის ფარმაცევტული რეგულატორების (FDA, EMA) მიერ დაშვებულ კოვიდ-19 პროფილაქტიკურ ყველა ვაქცინას (ფაიზერ/ბიონტეკი, მოდერნა, ასტრაზენეკა, ცილაგი /ჯონსონი და ჯონსონი) მინიჭებული აქვს გადაუდებელი აუცილებლობის ავტორიზაცია (Emergency Use Authorization).
გადაუდებელი აუცილებლობის ავტორიზაციის გაცემის საფუძველი გახდა კოვიდ-19-თან დაკავშირებული რისკი/სარგებლის შეფასება და კლინიკური კვლევების შუალედური მონაცემების ანალიზი.
კოვიდ-19 ვაქცინაციის (ფაიზერ /ბიონტეკი) შემდეგ ორსულებში გამომუშავებული ანტისხეულების რაოდენობა არ განსხვავდებოდა საკონტროლო (არა ორსული) ჯგუფის პაციენტებში გამომუშავებული ანტისხეულების რაოდენობას.
კოვიდ-19 ვაქცინაციის (ფაიზერ/ბიონტეკი) შემდეგ ორსულებში გამომუშავებული ანტისხეულების (IgG, IgA, IgM) კონცენტრაცია სჭარბობდა კოვიდ-19-ით ინფიცირებულ ორსულებში გამომუშავებული ანტისხეულების ისტორიულ მაჩვენებლებს.
ორსულების ვაქცინაციის შემდეგ კოვიდ-19 ვირუსის საწინააღმდეგო ანტისხეულები აღმოჩენილი იქნა ჭიპლარის სისხლში და მეძუძური ქალების რძეში; რაც მიუთითებს ნაყოფის „პასიურ“ იმუნიზაციაზე.
ახდენს თუ არა კოვიდ19-ის საწინააღმდეგო ვაქცინა გავლენას ფერტილობაზე ?
ამ დროისთვის არ არსებობს არანაირი მტკიცებულება რომ ვაქცინაციას შეუძლია უშვილობის პროვოცირება. საერთოდ არანაირი. ჩატარდა კვლევა სპერმის ხარისხზე Pfizer-ით აცრილებში. კვლევამ აჩვენა რომ ფაიზერით აცრილებში სპერმის ხარისხი არ შეიცვალა. ვინც ორსულობას უახლოეს პერიოდში გეგმავს, აუცილებლად უნდა აიცრას და ვაქცინაციიდან ორ კვირაში შეუძლია დაგეგმოს ორსულობა .
უნდა აიცრან თუ არა მეძუძური ქალები და როგორ მოქმედებს ვაქცინა დედის რძეზე?
არსებული პრეკლინიკური და კლინიკური დაკვირვებების საფუძველზე აშშ დაავადებათა კონტროლის ცენტრი (CDC), მენ-გინეკოლოგთა საერთაშორისო ასოციაცია (FIGO), ბრიტანული მეან-გინეკოლოგთა კოლეჯი (RCOB) ასკვნიან რომ
კოვიდ-19 ვაქცინის შეთავაზება შესაძლებელია როგორც ორსულებისთვის, ასევე მეძუძური ქალებისთვის.
ვაქცინაცია განსაკუთრებით მნიშვნელოვანია იმ ორსულებისთვის, რომლებიც განეკუთვნებიან კოვიდ-19-ით ინფიცირების მაღალ რისკჯგუფებს (მაგ. სამედიცინო პერსონალი) ან კოვიდ-19-ით შესაძლო გართულებების მაღალ რისკჯგუფებს (მაგ. გესტაციური დიაბეტი).
womens-health/covid-19-vaccines-and-pregnancy/covid-19-vaccines-pregnancy-and-breastfeeding/
