რკინა არის საკვები ნივთიერება, რომელიც აუცილებელია ჰემოგლობინის წარმოსაქმნელად. ის კი ხელს უწყობს ჟანგბადის გადატანას სხეულის ყველა ნაწილში.
რკინა აუცილებელია შემდეგი პროცესებისთვის:
- ორგანიზმის ჟანგბადით მომარაგება
- კუნთების მეტაბოლიზმი
- შემაერთებელი ქსოვილის წარმოქმნა
- ფიზიკური ზრდა
- ნერვების განვითარება
- უჯრედის ფუნქციონირება
- ზოგიერთი ჰორმონის წარმოქმნა.
ამერიკის პედიატრიის აკადემიის ახალი რეკომენდაციით, მხოლოდ ძუძუთი კვებაზე მყოფ ბავშვებს 4 თვიდან სჭირდებათ რკინის შემცველი დანამატი ყოველდღიურად 1 მილიგრამი სხეულის ყოველ კილოგრამზე მანამ, სანამ დამატებითი კვებისგან არ მიიღებენ საკმარის რკინას. ხოლო ჩვილებმა, რომლებიც არიან ხელოვნურ კვებაზე, უნდა მიიღონ რკინით გამდიდრებული ფორმულა.
რკინადეფიციტური ანემია
რკინის დაბალმა დონემ შეიძლება გამოიწვიოს ანემია, ამ დროს სხეულში სისხლის წითელი უჯრედების რაოდენობა იკლებს, რაც იწვევს მნიშვნელოვან ორგანოებში ჟანგბადის მიღების გაძნელებას.
თუ თქვენს შვილს აქვს რკინის დაბალი დონე, შეგიძლიათ შეამჩნიოთ შემდეგი სიმპტომები:
- სიფერმკრთალე
- გაღიზიანება
- უმადობა
მოგვიანებით, შესაძლოა გამოვლინდეს შემდეგი სიმპტომები:
- ზრდის შენელება
- მოტორული უნარების განვითარების შეფერხება
- ინფექციების უფრო მეტი რაოდენობა, რადგან რკინა ხელს უწყობს იმუნურ სისტემას.
კვლევების მიხედვით, ბავშვები, რომლებიც სვამენ შავ ჩაის, უფრო მიდრეკილი არიან რკინადეფიციტური ანემიისკენ. რადგან მასში შემავალი ტანინი ხელს უშლის რკინის შეწოვას. მეორე მიზეზი შეიძლება იყოს ის, რომ ჩაის დალევით თავს გრძნობენ დანაყრებულად და უარს ამბობენ საჭმელზე.
რა რაოდენობის რკინა სჭირდებათ ბავშვებს?
0–6 თვე: 0.27 მგ დღეში
6–12 თვე: 11 მგ დღეში
1–3 წელი: 7 მგ დღეში
4-8 წელი: 10 მგ დღეში
ნაადრევ ან დაბალი წონის მქონე ახალშობილებს, ჩვეულებრივ, უფრო მეტი რკინა სჭირდებათ.
იმისთვის, რომ ორგანიზმმა მეტი რკინა შეიწოვოს, მიირთვით რკინით მდიდარი საკვები C ვიტამინით მდიდარი საკვების პარალელურად. ამასთანავე, გაითვალისწინეთ, რომ ფრინველის, საქონლისა და თევზის ხორცში შემავალი რკინა („ჰემური“ რკინა) 2-3-ჯერ უფრო კარგად შეიწოვება მცენარეების რკინასთან შედარებით („არაჰემური“ რკინა).
რკინით მდიდარი პროდუქტებია:
100 გრ. წითელი ხორცი: 2.7 მგ რკინა
100 გრ. ნედლი ისპანახი: 2.7 მგ რკინა
28 გრ. გოგრის თესლი: 2.5 მგ. რკინა
86 გრ. მზა პარკოსნები: 1.8 გრ. რკინა
1 ჭიქა ნედლი მარცვლეული: 3.5 მგ. რკინა
წყარო: www.healthline.com
