როგორ დავეხმაროთ ბავშვებს ჯანსაღი წონის შენარჩუნებაში?

ამერიკის შეერთებულ შტატებში, ბოლო ორი ათწლეულის განმავლობაში, ჭარბი წონის მქონე ბავშვების რაოდენობა მუდმივად იზრდება. საქართველოში 5 წლამდე ბავშვების 6 პროცენტი ჭარბწონიანია. ეს კი იწვევს ჯანმრთელობის პრობლემებს, როგორც ამ ასაკში, ასევე მოზრდილობაში.

მშობლებს შეუძლიათ დაეხმარონ ბავშვებს ჯანსაღი წონის შენარჩუნებაში, ჯანსაღი კვების ჩვევების განვითარებით, ბალანსირებული კვებით, ფიზიკური აქტივობით, საეკრანო დროის  შემცირებით და ასაკის შესაფერისი ძილის რეჟიმის შექმნით.

ჭარბი წონის მქონე ბავშვების მიზანია წონის მომატების სიჩქარის შემცირება. მათ დიეტა უნდა დაენიშნოთ მხოლოდ ექიმის მიერ.

ჯანსაღი კვების ჩვევების ჩამოყალიბება

• შესთავაზეთ ბევრი ბოსტნეული, ხილი, დაუცეხვავი პურეული და მარცვლეული.
• 2 წლიდან დაბალი ცხიმიანობის ან უცხიმო რძე და რძის პროდუქტები შესთავაზეთ, მათ შორის იოგურტი და ყველი.
• ცილების მისაღებად შესთავაზეთ მჭლე ხორცი, ფრინველი, თევზი, ოსპი და ლობიო.
• წაახალისეთ თქვენი ოჯახი, რომ დალიონ საკმარისი რაოდენობის წყალი.
• შეზღუდეთ შაქრიანი სასმელები.
• შეზღუდეთ შაქრისა და გაჯერებული ცხიმის მოხმარება.

გახსოვდეთ, რომ ყოველდღიური მცირე ცვლილებები წარმატებამდე მიგვიყვანს.

შეზღუდეთ კალორიებით მდიდარი საკვები

ცხიმიანი და შაქრიანი ან მარილიანი საჭმლის შემცირება თქვენს შვილებს ხელს შეუწყობს ჯანსაღი კვების ჩვევების ჩამოყალიბებაში. მხოლოდ იშვიათად აჭამეთ მსგავსი საჭმლები, ყოველდღიურად კი გაითვალისწინეთ ქვემოთ მოცემული მარტივად მოსამზადებელი, უცხიმო და ნაკლები შაქრის მქონე საჭმლის მაგალითები, რომლებშიც 100 კალორია ან ნაკლებია:

• 1 ჭიქა სტაფილო, ბროკოლი, ან ბულგარული წიწაკა 2 სუფრის კოვზი ჰუმუსით.
• საშუალო ვაშლი ან ბანანი.
• 1 ჭიქა მოცვი ან ყურძენი.
• 1/4 ჭიქა თინუსი გახვეული სალათის ფოთოლში.

წაახალისეთ ფიზიკური აქტივობა

გარდა იმისა, რომ ბავშვებისთვის სახალისოა, რეგულარულ ფიზიკურ დატვირთვას ჯანმრთელობის მრავალი სარგებელი მოაქვს, მათ შორის:

• ძვლების გამაგრება.
• არტერიული წნევის დაქვეითება.
• სტრესის და შფოთვის შემცირება.
• თვითშეფასების გაზრდა.
• წონის მართვაში დახმარება.

3-დან 5 წლამდე ასაკის ბავშვები უნდა იყვნენ აქტიურები მთელი დღის განმავლობაში. 6-დან 17 წლამდე ასაკის ბავშვები და მოზარდები ფიზიკურად აქტიურად უნდა იყვნენ დღეში მინიმუმ 60 წუთი. ჩართეთ აერობიკა დღის განრიგში, რაც  პატარების გულისცემას ააჩქარებს. ასევე ძვლების გამაძლიერებელი აქტივობები, როგორიცაა სირბილი ან ხტომა და კუნთების გამაძლიერებელი მოქმედებები, როგორიცაა ცოცვა ან აზიდვები.

გახსოვდეთ, რომ ბავშვები ბაძავენ მოზრდილებს. ივარჯიშეთ ყოველდღიურად და  წაახალისეთ თქვენი შვილი, რომ შემოგიერთდეთ.

შეამცირეთ ჯდომის დრო

შეზღუდეთ ბავშვებისთვის ტელევიზორის ყურების, ვიდეო თამაშების ან ინტერნეტის გამოყენების დრო დღეში არაუმეტეს 2 საათისა. გარდა ამისა, ამერიკის პედიატრიის აკადემია გირჩევთ 2 წელზე უმცროსი ასაკის ბავშვები მოარიდოთ ეკრანს. ამის ნაცვლად, წაახალისეთ ბავშვები, ოჯახის წევრებთან ან მარტო დაკავდნენ სახალისო აქტივობებით.

შეუქმენით ასაკის შესაფერისი ძილის რეჟიმი

ძილის ნაკლებობა შეიძლება იყოს ჭარბწონიანობის გამომწვევი. რადგან ის  გვაიძულებს,  ვჭამოთ მეტი და ვიყოთ ფიზიკურად ნაკლებად აქტიურები. ბავშვებს უფრო მეტი ძილი სჭირდებათ, ვიდრე მოზრდილებს და ძილის საჭირო საათების რიცხვი ასაკის მიხედვით იცვლება. ნახეთ ჩვენი სტატია, რომელ ასაკში რამდენ საათს უნდა ეძინოს ბავშვს.

წყარო: ამერიკის დაავადებათა კონტროლისა და პრევენციის ცენტრი