დიაბეტი და სტრესი
ძალიან დიდმა სტრესმა, რაც არ უნდა გამოიწვიოს ის, შეიძლება გაართულოს დიაბეტის მართვა. ამ დაავადების სიმპტომებს და მკურნალობას ისედაც ახლავს სტრესი. COVID-19 ზრდის ამ ზეწოლას, რადგან თან ერთვის სამსახურის დაკარგვის ან ჯანმრთელობის გამო შიში, ახალი ამბებით გადაღლა, მეგობრებისგან შორს ყოფნით გამოწვეული მარტოობის შეგრძნება. მთელი ამ სტრესის მართვა დაგეხმარებათ დიაბეტის უკეთ კონტროლში.
როგორ მოქმედებს სტრესი სისხლში შაქრის დონეზე?
სტრესულ სიტუაციებში ინსულინის დონე ეცემა და სტრესის ჰორმონის დონე მაღლა იწევს. ეს ართულებს ინსულინის მუშაობას ისე, როგორც საჭიროა. ამ ყველაფერმა შეიძლება სისხლში შაქრის მომატება გამოიწვიოს. თუ სტრესის დასაძლევად მანუგეშებელ საკვებს ან ალკოჰოლს იღებთ, ამან შეიძლება გააუარესოს მდგომარეობა.
ჯანსაღი ჩვევები შეიძლება დაეხმაროს სისხლში შაქრის დონის მართვას
სტრესულ პერიოდში ჯანსაღი ჩვევები დაგეხმარებათ სტრესის შემცირებაში და სისხლში შაქრის დონის მართვაში. თუ აკვირდებით, სისხლში შაქრის კვლევის დროს მშვიდად ხართ თუ აღელვებული, შეამჩნევთ, რომ გარკვეული ქცევები იწვევს თქვენი რიცხვების მატებას. ამ გზით შეგიძლიათ დაგეგმოთ სტრესის შემცირება მოცემულ დროს.
მიჰყევით რუტინას
დადგენილი გრაფიკი დაგეხმარებათ უფრო მშვიდად იყოთ, თუნდაც სტრესულ, გაურკვეველ დროს. ამ შემთხვევაში თქვენ ნაკლებად მოგიწევთ კვების გამოტოვება, წამლის მიღების დავიწყება ან გვიან დაძინება.
ნაკლებად ადევნეთ თვალი ახალ ამბებს
პანდემიის დროს ახალ ამბებზე ზედმეტად დამოკიდებულებამ შეიძლება დამატებითი სტრესი გამოიწვიოს, ეს კი გავლენას იქონიებს სისხლში შაქრის დონეზე.
მიირთვით ჯანსაღი საკვები
ვინაიდან სტრესმა შეიძლება სისხლში შაქრის დონე დააგდოს, შეეცადეთ ყველაფერი გააკეთოთ, რომ შეძლოთ მისი მართვა. ნუ გაინებივრებთ თავს მავნე საკვებით, რათა გაუმკლავდეთ პანდემიის სტრესს. ამის ნაცვლად, დაიცავით თქვენი ჩვეულებრივი ჯანსაღი კვების გეგმა, მათ შორის დაბალანსებული კვება და სწორი ულუფები.
მოერიდეთ არაჯანსაღ ცდუნებებს
ზოგი ადამიანი სტრესულ სიტუაციებში მიმართავს სიგარეტს ან ალკოჰოლს, მაგრამ მათი თავიდან აცილება გონივრული არჩევანია. მოწევის დროს, ნიკოტინი ზრდის სისხლში შაქარს და ართულებს კონტროლს. ალკოჰოლმა შეიძლება ძალიან შეამციროს სისხლში შაქრის დონე, განსაკუთრებით მაშინ, თუ ჭამამდე დალევთ ან შემდეგ ივარჯიშებთ.
ივარჯიშეთ ყოველდღე
ფიზიკური აქტივობა ხელს უწყობს სტრესის განმუხტვას და განწყობას აუმჯობესებს. მას ასევე შეუძლია შეამციროს სისხლში შაქარი და არტერიული წნევა. შეიძლება ეს უკეთ ძილშიც დაგეხმაროთ. მიზნად დაისახეთ ყოველდღე 30 წუთიანი ვარჯიში და შეეცადეთ გაიხალისოთ ის. იარეთ მეგობართან ერთად (წესების დაცვით), ან დაურეკეთ სიარულის დროს.
გამოიძინეთ
კვლევამ აჩვენა, რომ როდესაც საკმარისად არ ისვენებთ, თქვენი ჰორმონის დონის ცვლილებები ართულებს შაქრის კონტროლს. დაიძინეთ და გამოიღვიძეთ ყოველდღე ერთსა და იმავე დროს და მიზნად ისახეთ 7-დან 8 საათამდე ხარისხიანი ძილი. ეს ნიშნავს, რომ ღამით მაქსიმუმ ერთხელ გამოიღვიძებთ და სწრაფად ჩაიძინებთ ხელახლა. დაისვენეთ ძილის წინ ერთი საათით სუსტი განათების პირობებში: შხაპი, კითხვა ან მშვიდი მუსიკა დაგეხმარებათ ამაში.
დაუკავშირდით თქვენს საყვარელ ადამიანებს
ესაუბრეთ მეგობრებს ან ოჯახის წევრებს თქვენს გრძნობებზე. ზოგიერთმა ადამიანმა შეიძლება შემოგთავაზოთ იდეები, რაც დაგეხმარებათ სტრესის მოგვარებაში. ესაუბრეთ ახლობლებს მსუბუქ თემებზეც: როდესაც ერთად იცინით, ეს ხელს უწყობს სტრესის განმუხტვას, რაც სისხლში შაქარს დონის მართვაში დაგეხმარებათ.
სცადეთ „მაინდფულნესი“
თავს უფრო მშვიდად იგრძნობთ, თუ ღრმად სუნთქავთ, მედიტირებთ ან „მაინდფულნესის“ მსგავსი ქცევით ვარჯიშობთ (მაგალითად, იოგა). ერთმა კვლევამ აჩვენა, რომ ტიპი 2 დიაბეტის მქონე ადამიანებს, რომლებიც იოგას ვარჯიშობდნენ კვირაში ორჯერ 12 კვირის განმავლობაში, შეუმცირდათ სისხლში შაქრისა და სტრესის დონე, ვიდრე ადამიანებს, რომლებიც კვირაში ორჯერ დადიოდნენ იმავე დროის განმავლობაში. კვლევამ აჩვენა, რომ „მაინდფულნესზე“ დაფუძნებული სტრესის შემცირების მეთოდი ეხმარება დიაბეტით დაავადებულებს სისხლში შაქრის დონის შემცირებაში.
წყარო: www.webmd.com
