დამატებითი კვების დაწყება ბავშვის ცხოვრებაში უმნიშვნელოვანესი ეტაპია. ეს მხოლოდ შიმშილის დაკმაყოფილება როდია – ეს ახალი გემოების, ტექსტურებისა და დამოუკიდებლობის აღმოჩენის სამყაროა.
თუმცა, საუკეთესო განზრახვების მიუხედავად, მშობლები ხშირად უშვებენ შეცდომებს, რომლებმაც შესაძლოა კვებითი ქცევის დარღვევა ან ზედმეტი სტრესი გამოიწვიოს. აი, 5 ყველაზე გავრცელებული შეცდომა და რეალური გზები მათ ასარიდებლად:
1. სიჩქარე თუ დაგვიანება
მშობლების ნაწილი თვლის, რომ 4 თვის ჩვილს პიურე უკეთ დაანაყრებს, ნაწილი კი 8 თვემდე მხოლოდ ძუძუთი კვებაზე ტოვებს ბავშვს.
- რეალობა: ჯანდაცვის მსოფლიო ორგანიზაციის (WHO) რეკომენდაციით, ოპტიმალური ასაკი 6 თვეა. 6 თვემდე საჭმლის მომნელებელი სისტემა მზად არ არის, ხოლო დაგვიანებისას იზრდება რკინადეფიციტური ანემიის და ღეჭვის რეფლექსის განვითარების შეფერხების რისკი.
2. ყურადღების გადატანის მცდელობა და ტელეფონი
„ერთი კოვზი დედიკოსთვის, ერთიც – სათამაშოსთვის“ „ნახე კურდღელიც ჭამს ტელეფონში“. ნაცნობი სცენარია? როდესაც ბავშვი ეკრანით ან სათამაშოთია გართული ის მექანიკურად ყლაპავს საჭმელს.
- რეალობა: ყურადღების გადატანით კვება თრგუნავს ნაყროვანების შეგრძნების უნარს. ბავშვმა უნდა იცოდეს, რომ ჭამს. გათიშეთ ეკრანები და გახადეთ ჭამის პროცესი ბუნებრივი ურთიერთობა.
3. ძალდატანება და „ცარიელი თეფშის“ სინდრომი
თუ თეფშზე ორი კოვზი დარჩა, დედას ხშირად უჩნდება სურვილი, ბავშვს ისიც დააძალოს.
- რეალობა: ბავშვები შესანიშნავად გრძნობენ საკუთარ სხეულს. თუ მან პირი დახურა, თავი მიაბრუნა ან ხელი ჰკრა თეფშს, ეს ნიშნავს, რომ დანაყრდა. იძულება იწვევს კვებით პროტესტს და მომავალში კვებით დარღვევებს.
4. მარილი, შაქარი და სანელებლები
„უშაქროდ ძალიან უგემურია, პატარას არ მოეწონება“ – ეს ზრდასრულის ცდუნებაა.
- რეალობა: ჩვილის გემოვნებითი რეცეპტორები სრულიად სუფთაა. მისთვის მოხარშული ყაბაყიც უგემრიელესია. 1 წლამდე მარილისა და შაქრის დამატება ზრდის თირკმლების დატვირთვას და აყალიბებს არასწორ კვებით ჩვევებს.
5. ალერგენებისგან შიში და მათი გადავადება
კვერცხი, თევზი, არაქისი – მშობლებს ხშირად ეშინიათ ამ პროდუქტების 1 ან 2 წლამდე მიცემა.
- რეალობა: თანამედროვე პედიატრიული კვლევები საპირისპიროს ამტკიცებს: ალერგენების ადრეული (6-12 თვის შუალედში) და სწორი ფორმით შეყვანა ორგანიზმს მათთან შეგუებაში ეხმარება და ამცირებს ალერგიის განვითარების რისკს.
ენდეთ თქვენს პატარას. დამატებითი კვება არ არის გამოცდა მშობლისთვის, ეს მხიარული თავგადასავალია, სადაც მთავარი ინგრედიენტები მოთმინება და პოზიტიური განწყობაა.
