Skip to content Skip to sidebar Skip to footer

მრავალნაყოფიანი ორსულობის დროს საშვილოსნოს ღრუში ვითარდება ერთზე მეტი ნაყოფი, ყველაზე ხშირად ორი. ტყუპები ზუსტად დაემგვანებიან თუ არა გარეგნულად ერთმანეთს, დამოკიდებულია იმაზე, თუ რამდენი კვერცხუჯრედი განაყოფიერდება ჩასახვის  დროს. ზოგჯერ ნაყოფიერდება მხოლოდ ერთი კვერცხუჯრედი და დაყოფის დროს ვითარდება ორი ემბრიონი – მონოზიგოტური ტყუპები, ერთდროულად ორი ან მეტი კვერცხუჯრედის განაყოფიერების დროს კი დიზიგოტური.

იდენტური (მონოზიგოტური) ტყუპები

იდენტური ტყუპები, რომლებსაც მონოზიგოტურ ტყუპებს უწოდებენ, ვითარდება ერთი განაყოფიერებული კვერცხუჯრედიდან. იმისდა მიხედვით, როდის გაიყოფა ეს კვერცხუჯრედი, შესაძლოა მათ საერთო პლაცენტა და ამნიონური ტომარა ჰქონდეთ. ისინი გაცილებით იშვიათად გვხვდება, ვიდრე დიზიგოტური ტყუპები (მხოლოდ 3-4 მშობიარობა ყოველ 1000 მშობიარობაში მსოფლიოში).

იდენტურ ტუპებს ყოველთვის ერთი და იგივე სქესი და თვალის ფერი აქვთ. მიუხედავად იმისა, რომ მათი დნმ მსგავსია, გარკვეული გარემო პირობები, მაგალითად საშვილოსნოში  მდებარეობა, გავლენას ახდენს თითოეული ბავშვის გარეგნობაზე და ისინი შეიძლება ოდნავ განსხვავდებოდნენ ერთმანეთისგან.

იდენტური ტყუპები შეიძლება განსხვავდებოდნენ თავის ფორმით, თმით, ასევე პიროვნული ნიშან-თვისებებით, ალერგიებით და ა.შ.

დიზიგოტური ტყუპები

ზოგჯერ ოვულაციის დროს ქალის სხეულში ორი კვერცხუჯრედი ერთდროულად თავისუფლდება და 2 სპერმატოზოიდი გაანაყოფიერებს 2 კვერცხუჯრედს. დიზიგოტური ტყუპების შემთხვევები ორჯერ უფრო ხშირია, ვიდრე მონოზიგოტურის.

დიზიგოტურ ტყუპებს არ აქვთ იდენტური დნმ და ისინი შეიძლება იყვნენ განსხვავებული სქესის და გარეგნობის.

სიამის ტყუპები

სიამის ტყუპები სხეულის რომელიმე ნაწილით ერთმანეთთან ფიზიკურად არიან დაკავშირებული. ეს მდგომარეობა გვხვდება ძალიან იშვიათად, 50,000-100,000 დაბადებიდან მხოლოდ 1-ში.

სიამის ტყუპები ვითარდება ორსულობის ადრეულ ეტაპზე, როცა ემბრიონი მხოლოდ ნაწილობრივად იყოფა ორი ნაყოფის ჩამოსაყალიბებლად. ყველაზე ხშირად სხეულების საერთო ნაწილი არის თავი, გულმკერდი, მუცელი, მენჯი ან ხერხემალი. სიამის ტყუპებს შესაძლოა საერთო შინაგანი ორგანოებიც ჰქონდეთ.

ზოგჯერ შესაძლებელია ქირურგიული ჩარევის შედეგად ტყუპების განცალკევება, რაც დამოკიდებულია შეერთების ადგილსა და საერთო შინაგანი ორგანოების რაოდენობაზე.

როგორ გავიგოთ, ტყუპები დიზიგოტურები არიან თუ მონოზიგოტურები?

თუ მშობლები ძალიან ცნობისმოყვარეები არიან და არ უნდათ დაელოდონ 1-3 წელი, მათ ამის გაგება დნმ-ის ტესტით შეუძლიათ  ბავშვების დაბადებისთანავე.

წაიკითხეთ ჩვენი სტატია ფაქტორებზე, რომლებიც ზრდის ტყუპების ყოლის ალბათობას https://dedamicis.ge/faqtorebi-romlebic-xels-uwyobs-tyupebis-yolas/

წყარო: www.whattoexpect.com